გერმანიის ფედერაციული რესპუბლიკის ტოპონიმთა წინამდებარე ლექსიკონი 2.100 ერთეულს მოიცავს. ნაშრომი ინტერდისციპლინური ხასიათისაა და მიზნად ისახავს, გააცნოს მკითხველს უპირველესად გერმანიის გეოგრაფიულ სახელთა ქართული ექვივალენტების სწორად ჩაწერა-წარმოთქმის ნორმები, პარალელურად – ასევე  შემოთავაზებულ ტოპონიმებთან დაკავშირებული უმთავრესი კულტურგეოგრაფიული და კულტურისტორიული ფენომენები.

წიგნის პოტენციურ მომხმარებლად მიიჩნევა ნებისმიერი დაინტერესებული პირი, უშუალო ადრესატად კი სოციალურ და ჰუმანიტარულ მეცნიერებათა დარგების სპეციალისტები: ფართო პროფილის ფილოლოგები, გეოგრაფები, კარტოგრაფები, ისტორიკოსები, კულტუროლოგები, ასევე პოლიტოლოგები, ჟურნალისტები, მოდერატორები, რომელთათვისაც ანალოგიური ცოდნა პროფესიული კომპეტენციების შემადგენელი ნაწილია.