ზუსტ და საბუნებისმეტყველო მეცნიერებათა ფაკულტეტი
ჰუმანიტარულ მეცნიერებათა ფაკულტეტი
სოციალურ და პოლიტიკურ მეცნიერებათა ფაკულტეტი
ფსიქოლოგიისა და განათლების მეცნიერებათა ფაკულტეტი
ეკონომიკისა და ბიზნესის ფაკულტეტი
მედიცინის ფაკულტეტი
იურიდიული ფაკულტეტი
ივანე ჯავახიშვილის სახელობის თბილისის სახელმწიფო უნივერსიტეტის ქართულ-ოსურ ურთიერთობათა სამეცნიერო-კვლევითი ცენტრის ორგანიზებით 15 მაისს ოსური ენის დღისადმი მიძღვნილი ღონისძიება გაიმართა, რომელიც ამავე დროს ქართველი ისტორიკოსის და საზოგადო მოღვაწის, თბილისის სახელმწიფო უნივერსიტეტის თანადამფუძნებლის ივანე ჯავახიშვილის 150 წლისთავისა და ოსი ენათმეცნიერის, ლექსიკოგრაფის, ფოლკლორისტის და ეთნოგრაფის ვასილ აბაევის ხსოვნას მიეძღვნა.
ღონისძიების მონაწილეებს საქართველოს ენის სახელმწიფო დეპარტამენტის თავმჯდომარე გიორგი ალიბეგაშვილი მიესალმა და დამსწრეებს ოსური ენის მნიშვნელობაზე ესაუბრა.
15 მაისი სიმბოლურად დაკავშირებულია ოსური სალიტერატურო ენის ფუძემდებლის, კოსტა ხეთაგუროვის, პოეტური კრებულის, „ოსური ლირას“, პირველ პუბლიკაციასთან (1899 წლის 15 მაისთან).უნდა აღინიშნოს ისიც, რომ კოსტა ხეთაგუროვის პოეტური კრებულის გამოცემას დიდი ყურადღება მიაქცია ილია ჭავჭავაძემ - ამ ფაქტს გაზეთმა „ივერიამ“ საგანგებო წერილი მიუძღვნა.
ოსური ენა ინდოევროპულ ენათა ოჯახის ირანულ ჯგუფს განეკუთვნება, თუმცა მასში გვხვდება კავკასიურ ენათა დამახასიათებელი ელემენტებიც. ოსური ენის მეცნიერული შესწავლა მჭიდროდ უკავშირდება ქართულ სამეცნიერო სკოლას. ამ მხრივ აღსანიშნავია ცნობილი ქართველი და ოსი მეცნიერების: გიორგი ახვლედიანის, ვასილ აბაევის, მზია ანდრონიკაშვილის, ოლღა თედეევის, არნოლდ ჩიქობავას, აკაკი შანიძის, ნაფი ჯუსოითის, თამერლან გურიევისა და სხვათა გამოკვლევები. ოსური ენის, ფოლკლორისა და ლიტერატურის შესწავლა ქართულ სამეცნიერო სივრცეში კვლავაც გრძელდება.
2015 წლიდან ივანე ჯავახიშვილის სახელობის თბილისის სახელმწიფო უნივერსიტეტში ფუნქციონირებს ქართულ-ოსურ ურთიერთობათა სამეცნიერო-კვლევითი ცენტრი. ბოლო წლებში გამოიცა მეცნიერულად და პრაქტიკულად ღირებული წიგნები: ქართულ-ოსური და ოსურ-ქართული ლექსიკონი (მთავარი რედაქტორი ნაირა ბეპიევი), ნართების ეპოსის ორენოვანი კრებული (შემდგენელი, მთარგმნელი და მთავარი რედაქტორი ნაირა ბეპიევი), ენციკლოპედია-ალბომი „ქართულ-ოსური ურთიერთობები“ (შემდგენელი და მთავარი რედაქტორი ნაირა ბეპიევი), ოსური წიგნის ბიბლიოგრაფია (ნაირა ბეპიევი) და სხვ.
