ზუსტ და საბუნებისმეტყველო მეცნიერებათა ფაკულტეტი
ჰუმანიტარულ მეცნიერებათა ფაკულტეტი
სოციალურ და პოლიტიკურ მეცნიერებათა ფაკულტეტი
ფსიქოლოგიისა და განათლების მეცნიერებათა ფაკულტეტი
ეკონომიკისა და ბიზნესის ფაკულტეტი
მედიცინის ფაკულტეტი
იურიდიული ფაკულტეტი
ივანე ჯავახიშვილის სახელობის თბილისის სახელმწიფო უნივერსიტეტის რექტორმა, აკადემიკოსმა ჯაბა სამუშიამ ცნობილი ქართველი მოღვაწის, რუსთველოლოგის ვიკტორ ნოზაძის 130 წლის იუბილესადმი მიძღვნილი ღონისძიებაზე მოხსენება წაიკითხა. ღონისძიება თსუ ჰუმანიტარულ მეცნიერებათა ფაკულტეტისა და „ვიკტორ ნოზაძის საზოგადოების“ ორგანიზებით გაიმართა.
თსუ რექტორის თქმით, „ვიკტორ ნოზაძის ბედი მჭიდროდ იყო დაკავშირებული საქართველოს ბედთან. ემიგრაციაში მყოფმა ბევრი რამ გააკეთა საქართველოს ისტორიის, კულტურის, „ვეფხისტყაოსნის“ პოპულარიზაციისთვის. მან მრავალ ქვეყანას გააცნო საბჭოთა იმპერიის მიერ გამომწყვდეული საქართველო.“ ჯაბა სამუშიას განცხადებით, თსუ მზადაა, რომ ხელი შუწყოს ვიკტორ ნოზაძის საარქივო მასალებზე დაყრდნობით შექმნილი წიგნების გამოცემას.
თსუ ჰუმანიტარულ მეცნიერებათა ფაკულტეტის დეკანის, პროფესორ ნანა გაფრინდაშვილის თქმით, „ვიკტორ ნოზაძემ, როგორც მეცნიერმა ქართველოლოგია წინ წასწია ევროპაში, ის გახლდათ ისეთი არაჩვეულებრივი ქართველოლოგიური გამოცემების ხელმძღვანელი, როგორიც იყო „კავკასიონი“, „თეთრი გიორგი“ და სხვა. სწორედ მათი საშუალებით აცნობდა ის ევროპას ქართულ ხელოვნებას, კულტურას და ლიტერატურას“.
ღონისძიებაში მონაწილეობდა ასევე, ვიკტორ ნოზაძის საზოგადოების ხელმძღვანელი სიმონ ნოზაძე, რომლის განცხადებითაც, თსუ ჰუმანიტარულ მეცნიერებათა ფაკულტეტის ფილოლოგიის მიმართულების წარჩინებული სტუდენტებისთვის დაწესდება მეცნიერის სახელობის სტიპენდია.
ვიკტორ ნოზაძის 130 წლის იუბილეს ეძღვნება თსუ-ში პროფესორ-მასწავლებელთა სამეცნიერო კონფერენცია და სტუდენტური სამეცნიერო კონფერენცია. კვირეულის ფარგლებში საქართველოს პარლამენტის ეროვნული ბიბლიოთეკის ქართული ემიგრაციის მუზეუმში გაიმართება გამოფენა. ასევე, დაგეგმილია ვიკტორ ნოზაძის სახელობის საჩხერის მუნიციპალიტეტის სოფელ მოძვის საჯარო სკოლის მოსწავლეებთან და პედაგოგებთან შეხვედრა და მუზეუმის დათვალიერება.
ვიკტორ ნოზაძე სწავლობდა ქუთაისის გიმნაზიაში, შემდეგ მოსკოვის უნივერსიტეტში. 1919 წელს, როგორც ნიჭიერი ქართველი ახალგაზრდა, საქართველოს დემოკრატიული რესპუბლიკის მთავრობის გადაწყვეტილებით, 70 ახალგაზრდა სტუდენტთან ერთად გაიგზავნა სწავლის გასაგრძელებლად ევროპაში - ლონდონისა და ბერლინის უნივერსიტეტებში. ვიკტორ ნოზაძე 1928 წლიდან ცხოვრობდა პარიზში, დააარსა და გამოსცემდა ლიტერატურულ-სამეცნიერო და პოლიტიკურ ჟურნალ „კავკასიონს“. ვიკტორ ნოზაძე არის „ვეფხისტყაოსნის“ შესახებ ნაშრომების სერიის ავტორი. მათ შორის არის ნაშრომები: „ვეფხისტყაოსნის ფერთამეტყველება“ (ბუენოს-აირესი, 1953 წელი); „ვეფხისტყაოსნის ვარსკვლავთმეტყველება“ (სანტიაგო დე ჩილე, 1959 წელი); „ვეფხისტყაოსნის მზისმეტყველება“ (სანტიაგო დე ჩილე, 1959 წელი); „ვეფხისტყაოსნის ღმრთისმეტყველება“ (პარიზი, 1975 წელი) და სხვ.