გეოგრაფია ერთ-ერთი პირველი სამეცნიერო დისციპლინაა, რომელიც უნივერსიტეტის დაარსების პირველივე წლებიდან დაწესდა ქართულ უნივერსიტეტში. ქართველ გეოგრაფთა თაობების აღიარება იყო ის ფაქტი, რომ 1958 წელს თბილისში ჩატარდა გეოგრაფთა დიდი თავყრილობა, რისთვისაც მოეწყო დროებითი ექსპოზიცია. გამოფენამ იმდენად მოხიბლა გეოგრაფები, რომ დაადგინეს თბილისის სახელმწიფო უნივერსიტეტში დაარსებულიყო გეოგრაფიის მუზეუმი. წელს ამ მუზეუმს 55 წელი შეუსრულდა ამ თარიღს მიეძღვნა გეოგრაფიული კვირეული უნივერსიტეტში, რომლის ფარგლებში თსუ მუზეუმში მოეწყო გეოგრაფიის მუზეუმის 55 წლის იუბილისადმი მიძღვნილი გამოფენა „თსუ გეოგრაფიის მუზეუმი - 55“, რომელზეც წარმოდგენილი იყო გეოგრაფიული მეცნიერების კათედრაზე შეგროვებული სამუზეუმო ექსპონატები: სხვადასხვა წლებში დამზადებული რარიტეტული გლობუსები (დედამიწისა და მთვარის), იშვიათი რელიეფური და ბეჭდური რუკები (მსოფლიოსა და საქართველოს, ფიზიკური, ჰიდროლოგიური, ეკონომიკური, რესურსების, სასაზღვრო...), საზომი ხელსაწყოები, ბარომეტრები, ფოტოები, რომლებზეც ასახულია გეოგრაფიულ მეცნიერებათა კორიფეები.

02/12/2013